elika Hemen zaude: Produkzio-sektoreakAbeltzaintza /  Abere Ongizatea elika

Abere Ongizatea

OILASKOAK BURTZORATZEKO METODO BERRI BAT ONARTU DUTE 18/05/21

Egile: ELIKA

Joan den maiatzaren 17an, indarrean sartu zen burtzoratze-metodo berri bat baimentzen duen Europako araudia; zehazki, gizentzeko oilaskoetan aplikatutako presio atmosferiko txikian oinarritutako metodoa da.


Europako 1099/2009 EE Araudiak arautzen ditu animaliek hilketan izaten duten ongizatea eta baimendutako burtzoratze-metodoak. Haren I. eranskinak burtzoratze-metodo baimenduak xedatzen ditu, eta eranskin hori aldatu egin da metodo berri hau sartzeko.

Metodo hau hala hilketa komertzialetarako nola hustuketa sanitarioetarako onartzen da, eta ezaugarri hauek ditu:

  • Deskribapena: animalia kontzienteei deskonpresio graduala aplikatzea, arnas daitekeen oxigenoa % 5etik behera murriztuz.
  • Erabilera-baldintzak: bizirik gehienez 4 kilo pisatzen duten gizentzeko oilaskoak; hilketa, hustuketa sanitarioa eta beste egoera batzuk.
  • Oinarrizko parametroak: deskonpresio tasa, esposizioaren iraupena, giro-tenperatura eta hezetasuna.


•    723/2018 CE Araudi berria.

ANIMALIEN ONGIZATERAKO BATZORDE NAZIONALA SORTU DA 18/03/12

Egile: Elika

Espainiako Albaitarien Elkargoen Kontseilu Nagusiak (CGCVE) Animalien Ongizaterako Batzorde Nazionala sortu du. Batzorde horren helburua izango da, besteak beste, oinarri zientifikoa duten arlo horretako dokumentuak egitea.


Organo hori Kontseiluko Zuzendaritza Batzarreko hiru kidek eta animalien ongizateko hainbat esparrutako lau adituk osatzen dute.


Otsailaren 20an egin zuten lehen bilera, eta bertan epe labur eta ertainerako jarduketa-gai nagusiak landu zituzten; besteak beste:

 

  • Alarma soziala pizten duten eta Batzordearen esku-hartzea behar duten egoeretan jarduteko mekanismo bat ezartzea, irizpide tekniko, zientifiko eta profesionalak erabiliz.
  • Animalien osasunari eta ongizateari, elikagaien segurtasunari eta animalienganako tratu txarren aurkako borrokari buruzko barne-prestakuntza ematea albaitariei, baita gizarte osoari ere.
  • Animalien ongizaterako protokolo bat osatzea, gai horren inguruko informazio eta gida desberdinak bateratuz, albaitarien lanbideko jarduketak zehazteko.
  • Animalien aurkako tratu txarrak identifikatzeko protokolo bat egitea, albaitariek halako egoerak detektatu eta behar diren neurriak har ditzaten.


Organo hau sortzea bat dator Europako gidalerroekin; izan ere, gidalerro horien arabera, animalien ongizatea kontuan hartu behar da politika guztietan zeharka eragiten duen faktore gisa, eta esparru horretan hartzen diren legegintza-neurriek irizpide zientifikoari jarraitu behar diote beti.

 

Hala, 625/2017 Erregelamenduaren (EE) 95. artikuluak ezartzen du Europar Batasuneko (EB) Erreferentzia Zentro bat sortu behar dela.


Ildo horretan, martxoaren 5ean 329/2018 Erregelamendua argitaratu zen, eta horren bidez Wageningen Livestock Research unibertsitatea (Herbehereak) buru duen partzuergoa izendatu zen Animalien Ongizaterako Europako Erreferentzia Zentro. Partzuergo horretako kide dira, halaber, Aarhuseko Unibertsitatea (Danimarka) eta Friedrich-Loeffler-Institut (Alemania). Erreferentzia Zentroaren zeregina izango da Batzordeak eta estatu kideek animalien ongizaterako betekizunen esparruan gauzatzen dituzten jarduera horizontalei babesa ematea.



Informazio gehiago – Espainiako Albaitarien Elkargoen Kontseilu Nagusiaren webgune ofiziala

ANIMALIEN ONGIZATEA ETA NAZIOARTEKO JARDUERETAKO LEHIAKORTASUNA 18/02/27

Egile: Elika

 

Nazioarteko merkataritzaren arloan, animalia-ongizatearekin lotutako arauak betetzeak lehia-desberdintasunak sortzen ditu Europako operadoreen artean. Bada, Europako Batzordeak, desberdintasun horiek murriztu diren aztertzeko asmoz, “Animalia-ongizatearen arloko nazioarteko jarduerek mundu globalizatu batean europar nekazarien lehiakortasunean duten eragina” izeneko txostena osatu du.


Txosteneko ondorioen artean hauek aipa daitezke:

 

  1. Animalien ongizateari buruzko nazioarteko jarduerak luzerako inbertsioa dira, eta inbertsio horrek hiru urrats hauek ditu oinarrian: sentsibilizazioa, gaitasunen errefortzua eta finantzaketa. Urte hauetan, Batzordeak baliabide garrantzitsuak jarri ditu egitasmo horiek aurrera ateratzeko.
  2. Batzordeak eta EBko estatu kideek animalien ongizateari buruzko sentsibilizazioa sustatu dute mundu osoan, eta emaitza handiak lortu dituzte.
  3. Batzordeak konpromiso sendoa du balioetan oinarritutako nazioarteko merkataritzarekin, «Guztiontzako merkataritza» estrategiak agerian uzten duen moduan, eta garrantzia ematen dio animalien ongizatea sustatzeari.
  4. Batzordeak hirugarren herrialdeekiko elkarrizketan animalia-ongizatea sartzea lortu du.
  5. EBk laguntza handia eman du OIEren arauak egiteko prozesuan.
  6. Aldebiko lankidetzari esker, errazago aplikatu ahal izan dira EBko inportazio-eskakizunak, hilketaren unean animalia-ongizatearen arauei buruzkoak.
  7. Batzordeak ikerkuntzarekin, prestakuntzarekin eta gaitasunen errefortzuarekin lotuta egin dituen jarduerak milaka profesionalengana heldu dira.


Europako Batzordeak, azken urteetan, hainbat ekintza egin ditu mundu osoan animalien ongizatea sustatzeko eta horren inguruan sentsibilizatzeko, alde batetik Europan exijitzen diren baldintzen berri emateko eta bestetik horrek guztiak beste herrialde batzuetako ekoizpenarekiko sortzen dituen lehia-desberdintasunak murrizteko.


Nazioarteko ekintza horien bidez, Europako Batasunak animaliei dagokienez dituen balioak indartu nahi dira, eta animalia-ongizatearen maila egokiak sustatu, batez ere EBko bazkide komertzialen artean. Europako Batzordeak, Animalien babeserako eta ongizaterako EBren estrategian (2012-2015), jada adierazi zuen animalia-ongizateari buruzko xedapenak sartu behar zirela aldebiko merkataritza-akordioetan edota beste lankidetza-modu batzuetan, baita hirugarren herrialdeekin batera zuzenean lan egin behar zela ere.



Txostena 2012an kaleraturiko «Study on the impact of animal welfare international activities» (Animalia-ongizatearekin lotutako nazioarteko jardueren eraginari buruzko azterlana) lanean dago oinarrituta.

15 orrialdetatik 1.a   Hurrengoa >>
ELIKA . Granja Modelo, z/g . 01192 . Arkaute (Araba) . Telefonoa: 945 122 170 . Faxa: 945 122 171 . berri@elika.eus
RSS iturria
WEB orri honek ez du besteren publizitaterik eta ez du jasotzen publizitatetik eratorritako finantzaziorik.
Diseño web Vitoria

Gure eta hirugarrenen cookieak erabiltzen ditugu, erabiltzaileen nabigazioa aztertzeko.

Bada, nabigatzen jarraitzen baduzu, cookieen erabilera onartzen duzula ulertuko dugu. Konfigurazioa aldatzeko edo informazio gehiago lortzeko jo hona.