elika Hemen zaude: Produkzio-sektoreakAbeltzaintza/  Higienea eta Praktika Egokiak elika

Higienea eta Praktika Egokiak

HIGIENE-JARDUNBIDE EGOKIEN GIDA EZTIAREN SEKTORERAKO 15/03/02

Egile: Gobierno de Aragón

Aragoiko Elikaduraren eta Nekazaritzako Elikagaiak Sustatzeko Zuzendaritza Orokorrak sustatu egin du eztiaren sektoreko higiene-jardunbide egokien gida. Sektorea bera aritu da horretan lanean, Abeltzaintzako Osasun Defentsako taldeetako teknikarien eta Abeltzaintza Baliabideen Zerbitzuko funtzionarioen bidez.

Gaur egun, Aragoin 1.219 erle-ustiategi daude erroldatuta; guztira 104.082 erlauntz dira, eta urtean 619 tona ezti inguru ekoizten dituzte. Ustiategi gehienak (% 68) txikiak dira: erroldaren % 30 eta ezti-ekoizpen guztiaren % 10 dira. Gainerakoetan ustiapen komertziala egiten da, bai beste jarduera batzuen osagarri gisa (ustiategien % 30 eta erlauntzen % 60), bai esklusiboki (ustiategien % 2, erlauntzen % 20 eta ekoizpenaren % 30).

Gidaren helburua da erraz aplikatzeko tresna operatibo bat ematea erlezainei, erabat egoki daitezen arauek ezarritako eskakizun guztietara; gainera, besteak beste, honako atal hauek biltzen ditu:

  • Eztiarekin lotutako arriskuak.
  • Eztiaren sailkapena.
  • Fluxuaren diagrama.
  • Higiene-jardunbide egokiak erletxean.
  • Jardunbide egokiak eztia biltzeko, ateratzeko eta egokitzeko prozesuetan.

Higiene-jardunbide egokien gida, eztiaren sektorerako - Aragoiko Gobernua
Aragoiko erlezaintzari buruzko webgunea - Aragoiko Gobernua

EUROPAK OHANTZEA USTIATEGIAN ERREGAI MODURA ERABILTZEA BAIMENDU DU 14/09/01

Egile: CE

Joan den ekainaren 4an, Europako Batzordeak 592/2014 Araudia argitaratu zuen, 142/2011 Araudia aldarazten duena, animalien azpi-produktuak kudeatzeko osasun-neurriei buruzkoa.


Aipatutako aldaketaren arabera, joan den uztailaren 15az geroztik ohantzea (hegaztiak hazi diren zorua) erabil daiteke erregai legez, abeletxean aldez aurreko eta in situ tratamendurik gabe.


Oilo-gorozkiak erregai legez erabiltzeko, zenbait baldintza bete behar dira, hala nola, nolako hauek:

  • Erretze-plantek agintaritza eskudunaren baimena izan behar dute.
  • Erabiliko den ohantze zaharra azalera gogor eta ondo drainatuaren gainean biltegiratu behar da.
  • Animaliak ezin izango dira bertara sartu.
  • Hondakinen igortzea ahal beste murriztu beharko da.
  • Higiene-neurrien artean ohantzea biltegiratzen den lekutik eratorritako hondakin-uren maneiatzea jaso behar da.

Sektorearen zati batek neurri hori optimismoz jaso badu ere, azaldu egin du osasun-arriskua eragin daitekeela aurreko ekoizpeneko hegazti sorta baten hondakinak hazkuntza berria abiarazten den nabearen alboan metatzean, arestian aipatutako baldintzetan eskatzen denaren ondorioz.

BETEKIZUN BERRIAK OILASKO ETA UNTXIEN HILTEGIETAN 14/05/29

Egile: MAAMA

Maiatzaren 10etik aurrera, eskortako hegaztien eta lagomorfoen (erbiak eta untxiak) hiltegietako langileek laguntza eman dezakete kontrol ofizialetan. 340/2014 Errege Dekretua argitaratzearekin batera sartu dira indarrean Espainian aipatutako espezieen hiltegietan egiten diren kontrol ofizialetan laguntzeko araudi berriak. Arauak Europako legegintzaren aukera bat garatzen du, higiene-kontuetan; zehazki, estatu kideei eskumena ematen die, hiltegietako langileek kontrol ofizialetan laguntza eman dezaten, baldintza jakin batzuetan eta albaitari ofizialaren kontrolpean.


854/2004 Araudia, giza kontsumorako animalia-jatorriko produktuen kontrol ofizialak antolatzeko arau zehatzak ezartzen dituena, araupetu egiten ditu albaitari ofizialen eta laguntzaile ofizialen jarduera hiltegietan, eta estatu kideei eskumena ematen die, araudiak berak ezarritako baldintza zehatzei jarraikiz, azken horien zereginetako bat establezimendu horietako langileek egin dezaten, kontrol ofizialetan lagunduz.

Kontrol ofizialetan laguntzaile aritzeko, hiltegietako langileek bete beharreko baldintzak honako hauek dira:

 

  1. 854/2004 Araudiaren I. eranskinaren IV. kapituluaren III. atalean (hiltegietako laguntzaileei buruzko zatia) zehaztutako kontzeptu praktiko eta teorikoen araberako prestakuntza eta kualifikazioa izan behar dituzte; esate betarako, honako hauen inguruko prestakuntza izan behar dute: animalien gaixotasunak, abereak hazteko jardunbide egokiak, ustiategietako instalazioak, animalien karga eta deskarga, lege-xedapenak...
  2. Bertaratzen direnen prestakuntza egiaztatzeko, lanbide-heziketako agiria edo profesionaltasun-ziurtagiria behar da; bestela, agintaritza eskudunak onartutako agiri bat eduki beharko da, ahalbidetu egiten duena egiaztatzea araudiak ezarritako prestakuntza-betekizun guztiak betetzen direla. Egiaztagiri horrek lurralde nazional osoan balioko du.
  3. Laguntzaileen jarduerak albaitari ofizialak gainbegiratuko ditu; zehazki, ebaluazio-azterketak egingo ditu maiztasun jakin batekin, azterketa horien froga dokumentalak utzita.

Beste alde batetik, autonomia-erkidegoko agintaritza eskudunak (AE) xedapen hori baimen dezan, hiltegiek honako hauek egin behar dituzte:

 

  1. Agintaritza eskudunari jarduera-plan bat aurkeztea, APPCCak (Arriskuen eta kontrol-gune kritikoen analisia) aintzat hartuta.
  2. Gutxienez azken hamabi hilabeteetan 854/2004 Araudiak ezarritako higiene-jardunbide egokiak betetzea.
  3. APPCC sisteman oinarritutako sistemak ezartzea.
  4. Establezimenduaren historial bat aurkeztu, araudiak ezarritako betekizunak betetzeari dagokionez.
  5. Ekoizpen- eta ikuskaritza-erregistro fidagarriak izatea, sistemaren eraginkortasuna baloratu ahal izateko, ezarri baino lehen eta ondoren.
  6. Lantzen diren hildako animalia-, haragi- eta produktu-motak ezagutaraztea, eta eragin dezaketen arriskuaren inguruan egiten diren lanen berri ematea.
  7. Ezagutza teoriko espezializatuak izatea.


6 orrialdetatik 1.a   Hurrengoa >>
ELIKA . Granja Modelo, z/g . 01192 . Arkaute (Araba) . Telefonoa: 945 122 170 . Faxa: 945 122 171 . berri@elika.eus
RSS iturria
WEB orri honek ez du besteren publizitaterik eta ez du jasotzen publizitatetik eratorritako finantzaziorik.
Diseño web Vitoria

Gure eta hirugarrenen cookieak erabiltzen ditugu, erabiltzaileen nabigazioa aztertzeko.

Bada, nabigatzen jarraitzen baduzu, cookieen erabilera onartzen duzula ulertuko dugu. Konfigurazioa aldatzeko edo informazio gehiago lortzeko jo hona.