elika Hemen zaude: Produkzio-sektoreak /  Abeltzaintza  /  Beste batzuk elika

Beste batzuk


EKOIZPEN EKOLOGIKORAKO ARAU BERRIAK 17/12/27

Egile: ELIKA

Estatu kideen eta Europako erakundeen arteko hainbat hiletako negoziazioen ondoren, joan den azaroaren 20an Europako Kontseiluak berretsi egin zuen ekoizpen ekologikoari buruzko egungo legeria aldatzeko erabakia; legeria berria 2021eko urtarrilaren 1ean sartuko da indarrean.

 

Aldaketa horren bitartez, harmonizatu egingo dira EB barruko praktika ekologikoak, eta egungo kontrol-sistema modernizatuko da. Oso beharrezkotzat jotzen zen egungo araudia eguneratzea; izan ere, kasu batzuetan, 20 urte zituen araudi horrek.

 

Ekoizpen ekologikoa hazten ari den sektorea da: ia 27.000 milioi euro mugitzen ditu eta azken hamar urteetan % 125 hazi da.

 

Aldaketaren hasierako helburua zen estatu kideetan aplikatzen diren salbuespen guztiak ezabatzea; hala ere, azkenean, salbuespen batzuk mantendu dira, besteak beste esplotazio mistoak izateko baimena (hau da, elikagai ekologikoak eta arruntak ekoizten dituztenak) edo 2035era arte hazi edo animalia arruntak erabili ahal izatea.

 

Beste alde batetik, aipatzekoa da 2017ko abenduaren 8ko 2017/2273 Exekuzio Araudiaren bitartez argitaratutako epeen luzatzea; horren bitartez, epea 2017ko abenduaren 31 izatetik 2018ko abenduaren 31 izatera igaro da. Epe hori honako hauei aplikatuko zaie: modu ekologikoan hazi ez diren oilandak erabiltzeko salbuespenezko ekoizpen-arauari eta txerriei nahiz eskortako hegaztiei ekologikoak ez diren pentsu proteikoen ehuneko txiki bat (% 5) emateari.

 

Aldaketak honako beste berritasun aipagarri hauek ere badakartza:

 

  • Bukatu egingo da Europar Batasuneko arauen eta beste herrialde batzuetako arauen arteko egungo ekibalentzia-sistema; horren ordez, “adostasun” mekanismo bat ezarriko da.

 

  • Kontrolak elikagaien ekoizpen-kateko maila guztietara hedatuko dira, nahiz eta sinpleagoak izango diren.

 

  • Urtean behin kontrolak egingo dira tokian bertan; hala ere, arrisku baxuko operadoreen kasuan (azken hiru urteetan ez zaie iruzurrik hauteman), kontrolak bi urtean behin egingo dira.

 

  • Ekoizle txikiek taldeko ziurtagiria jasotzeko aukera izango dute.

 

  • Prebentzio-neurri zorrotzagoak ezarriko dira; horri esker, baimendu gabeko substantziek elikagaiak ustekabean kutsatzeko arriskua murriztuko da.

 

  • Arau berriek orain arte baino elikagai ekologiko eta elikagaiak ez diren artikulu ekologiko gehiago arautzen dituzte, besteak beste gatza, artelazkia edo esentzia-olioak.

 

EEko esteka ofizial interesgarriak:

 

 

 

 

 

ELIKAGAIAK EKOIZTEKO ANIMALIETAN ANTIMIKROBIANOAK ERABILTZEARI BURUZKO GIDA 17/11/10

Egile: OMS

OMEk jarraibide batzuk atera berri ditu elikagaiak ekoizteko animalietan medikuntzarako garrantzitsuak diren antimikrobianoak nola erabili azaltzeko. Hain zuzen ere, gomendatu dute abeltzainek eta elikagaien industriak utzi egin behar diotela antibiotikoak eguneroko jardunean erabiltzeari, eta animalia osasuntsuen hazkuntza sustatu eta gaixotasunak prebenitu behar dituztela. Jarraibide horiekin, giza medikuntzarako garrantzitsuak diren antibiotikoen eraginkortasunari eutsi nahi diote, animalietan gutxiago erabilita.

 

OMEk adierazi duenez, herrialde batzuetan, garrantzi medikoa duten antibiotikoen kontsumo osoaren % 80 inguru animalien sektorean egiten da, animalia osasuntsuak bizkorrago hazteko helburuarekin, batik bat.

 

The Lancet Planetary Health aldizkarian argitaraturiko berrikuspen sistematiko batean ondorioztatzen denez, elikagaiak ekoizteko animalietan antibiotiko gutxiago erabiltzeko interbentzioek % 39raino murrizten dituzte antibiotikoekiko erresistenteak diren bakterioak animalia horietan. Ikerketa hori OMEren jarraibide berriak egiteko oinarri gisa hartu zen zuzenean.

 

OMEk dioenez, animalia osasuntsuei antibiotikoak eman beharko litzaizkieke gaixotasunak prebenitzeko, baldin eta gaixotasun hori azienda bereko beste animalia batzuetan edo arrain-populazio berean diagnostikatu bada aurretik.

 

Ahal dela, beti probak egin behar zaizkie animalia gaixoei, infekzio espezifiko hori zentzuz tratatzeko antibiotikorik eraginkorra zein den erabakitzeko. Animalietan erabiliko diren antibiotikoak hautatzeko orduan, OMEren arabera, giza osasunerako «garrantzi gutxiena» dutenak aukeratu behar dira, eta ez «garrantzi kritikoa eta lehentasun gorena» dutenak. Antibiotiko horiek bestelako tratamendurik ez dagoenean ematen dira, edo gizakietako bakterio-infekzio larriak tratatzeko dauden tratamendu mugatu batzuen parte izan ohi dira.

Elikagaiak ekoizteko animalietan garrantzi medikoko antibiotikoak erabiltzeari buruzko OMEren jarraibideak

 

Bestalde, OMEk giza medikuntzarako garrantzi kritikoa duten antimikrobianoen zerrenda bat argitaratu zuen 2005ean, eta aldian-aldian gaurkotzen da, farmakoak zentzuz erabil daitezela sustatzeko. Zerrendan, hiru kategoriatan sailkatzen dira gaur egun gizaki eta animalietan erabiltzen diren antibiotikoak –«garrantzitsuak», «oso garrantzitsuak» eta «garrantzi kritikokoak»–, giza medikuntzarako duten garrantziaren arabera.

 

2017ko apirilean kaleraturiko zerrendaren bosgarren berrikuspenaren arabera, garrantzi kritikoko antimikrobianoen artean honako hauek dira lehentasun gorenekoak: kinolonak, hirugarren belaunaldiko edo geroagoko zefalosporinak, makrolidoak eta zetolidoak, glikopeptidoak eta polimixinak (kolistina ere esaten zaie). Antibiotiko horiek ezinbestekoak dira gizakietako infekzio multierresistenteei aurre egiteko, beste tratamendurik ez dagoen kasuetan.

Giza medikuntzarako garrantzi kritikoa duten antimikrobianoen zerrenda, OMErena, 5. berrikuspena

 

SIMAUR KUTSATUAREN BIDEZKO INFEKZIOAK 17/11/06

Egile: RIVM

Herbehereetako Osasun Publikoaren eta Ingurumenaren Institutu Nazionalak (RIVM) egindako literatur azterketa batek erakusten duenez, simaurraren infekzio-arriskuei buruz ez da ia edo batere ikerketarik egin. Aurkikuntza nagusietako bat izan zen ikertutako bakterio patogenoak sarritan simaurrean egoten direla eta uraren eta haizearen bidez barreia daitezkeela. RIVMren arabera, gehiago ikertu behar da simaurrak gaixotasun baten kargan zenbateraino eragiten duen ikusteko.

 

Herbehereetan, jendea abeletxeetatik oso gertu bizi da. RIVMk abeltzaintzak giza osasunean dituen askotariko eraginei buruzko ikerketak egiten ditu. Azken txosten horretan, zehazki, txerrien eta behi-aziendaren simaurrean egon ohi diren bakterio patogenoen kopuruari buruzko zientzia-literatura aztertu du (izan ere, Herbehereetako simaur gehiena animalia horietatik dator).

 

Patogenoen transmisioa uraren eta haizearen bidez

Ikertzaileek aztertu zuten, alde batetik, patogeno horiek zenbateraino ibiltzen diren uretan eta haizean, eta, bestetik, patogeno horiek zer-nolako arriskuak ekar diezazkioketen giza osasunari. Azterlan esploratorio horren ardatza E. coli bakterioaren aldaera patogenikoa eta metizilinarekiko erresistentea den Staphylococcus aureus bakterioa (MRSA) izan ziren; izan ere, bakterio horiek ondo irauten dute uretan eta haizean, hurrenez hurren. Era berean, bakterio horiek nola jokatzen duten eta simaurretik gizakiengana nola hedatzen diren jakitea ere baliagarria izan daiteke, beste patogeno batzuek nola jokatzen duten eta nola hedatzen diren jakiteko.

 

Literaturaren berrikuspen sistematiko horri esker, beste pauso bat eman da simaurrean dauden eta gaixotasunak eragiten dituzte bakterioen kopurua identifikatzeko, batetik, eta simaurreko patogenoak ingurumenaren bidez (uretatik eta haizetik) zenbateraino heda daitezkeen zehazteko, bestetik.

 

Simaurrak osasunean eragin ditzakeen arriskuei buruzko ikerketa gutxi

Ondorio nagusia izan da ez dela ia edo batere ikerketarik egin simaurretik datozen eta uraren eta haizearen bidez transmititzen diren patogenoek giza osasunean eragin ditzaketen arriskuei buruz. Horrenbestez, gaur-gaurkoz ezin da zehaztu simaurrak zenbateraino eragiten duen gaixotasunen kargan (kasu honetan, Herbehereetan).

 

Alabaina, azterturiko uretako eta haizeko patogenoak modu erregularrean aurkitu ziren simaurrean. Ikertu ziren E. coli eta MRSA bakterioetan oinarrituta, badirudi infekzio-arrisku txikiagoa sortzen duela haizeko esposizioak, azaleko ureko esposizioak baino. Kasurako, simaurra konpostaren, hartziduraren edo arazketa biologikoaren bidez tratatuz gero, patogeno gutxiago sortuko lirateke.

 

Simaurraren infekzio-arriskuari buruzko RIVMren berrikuspena

13 orrialdetatik 1.a   Hurrengoa >>
ELIKA . Granja Modelo, z/g . 01192 . Arkaute (Araba) . Telefonoa: 945 122 170 . Faxa: 945 122 171 . berri@elika.eus
RSS iturria
WEB orri honek ez du besteren publizitaterik eta ez du jasotzen publizitatetik eratorritako finantzaziorik.
Diseño web Vitoria

Gure eta hirugarrenen cookieak erabiltzen ditugu, erabiltzaileen nabigazioa aztertzeko.

Bada, nabigatzen jarraitzen baduzu, cookieen erabilera onartzen duzula ulertuko dugu. Konfigurazioa aldatzeko edo informazio gehiago lortzeko jo hona.