elika Hemen zaude: Produkzio-sektoreakAbeltzaintza / Abere Osasuna elika

Abere Osasuna

BEEREN KASUAK PENTSUAK ERABAT DEBEKATU OSTEAN JAIOTAKO ANIMALIETAN 17/07/20

Egile: EFSA

2005etik 2015era bitartean, EBko 73.000.000 behi ingururi probak egin zizkieten behien entzefalopatia espongiformea (BEE) zeukaten aztertzeko; behi horietatik, debekuaren ostean jaiotako 60 animaliak emaitza positiboa izan zuten BEE klasikoaren kasuan. BEEren kasuan emaitza positiboa izan zuten animalien kopurua 1.259ra areagotzen da, debekuaren aurretik jaiotako abereak kontuan hartzen badira. 

Bestalde, BEEren kasu klasikoak nabarmen gutxiago dira EBn urteek aurrera egin ahala: 2005ean 554 kasu jakinarazi ziren, eta 2015ean, berriz, bi besterik ez (biak debekuaren ostean jaiotakoak ziren).

Garbi dago Europak laurogeiko krisialdiaren ondoren BEEri eman dion erantzunari esker izugarri murriztu dela gaixotasunaren prebalentzia behietan. Hala ere, oraindik ere kasu bakan batzuk erregistratzen dira EBn; hori dela eta, Europako Batzordeak kasuon jatorria ikertzeko eskatu zion EFSAri.

EBn BEE kontrolatzeko oinarrizko neurria ganaduaren elikaduran animalia-proteinak debekatzea izan zen. Izan ere, BEE pentsu kutsatuen bitartez transmiti dakieke behiei, batez ere bizitzako lehen urtean.

BEE klasikoaren hirurogei kasu jakinarazi dira EBren debekua 2001ean ezarri ondoren jaiotako behiekin lotuta. Animalia horietako bat ere ez zen elikakatean sartu. Nabarmentzekoa da BEE klasikoa gizakiei transmiti dakiekeen BEE mota dela. Batzordeak EFSAri eskatu zion zehaztu zezala ea kasu horiek pentsu kutsatuek eragin zituzten edo bat-batean sortu ziren, hau da, bistako kausarik gabe.

EFSAko adituek ondorioztatu zuten pentsu kutsatuak direla infekzio-iturri probableena. Horren arrazoia da BEE eragiten duen agente infekziosoa urte askoan aktibo egoteko gai dela. Litekeena da behiek pentsu kutsatuak jan izana, BEEren agente infekziosoa presente zegoelako janaria gordetzean edo manipulatzean. Bestalde, baliteke pentsu kutsatuen osagaiak EBtik kanpoko herrialdeetatik inportatu izana, eta horrek ere eragin litzake BEE kasuak.

Adituek ezin izan zituzten beste kausa batzuk bazter utzi, kasuak banan-banan ikertzea oso zaila delako. Izan ere, alde batetik, gaixotasuna luzaroan inkubatzen da, eta, bestetik, jarraipen-ikerketa egitean, abeletxeetan ez zegoen informazio zehatz nahikorik, eta horrek zaildu egin zuen ikerketa.

 

Informazio gehiago

HEGAZTI-GRIPEA FRANTZIAN 17/07/07

Egile: Elika

Ekainaren 30ean patogenotasun handiko H5N8 hegazti-gripearen (H5N8 PHHG) kasu bat baieztatu zen Frantzian; zehazki, Brillon hirian izan zen, herrialdeko Nord departamenduan.

Frantziako azken agerraldia martxoaren 17an jakinarazi zen, eta hau da gaur egungo kasuen kopurua:

  • 485 agerraldi abeltegi komertzial eta ez-komertzialetan.
  • 55 kasu hegazti basatietan.

Fokuaren jatorri izan diren instalazioak Tournai-en (Belgika) dauden beste instalazio batzuetatik 15 km-ra daude; bertan hegazti ez-komertzialak dituzte eta uste da fokua merkatu batean erositako uso eta oilaskoek eragina izan daitekeela.

Ekain hasieratik hegazti-gripearen kasu gehiago ere baieztatu dira Belgikan, nagusiki apaingarri gisa hazten diren hegaztietan.

Birusa zabal dadila saihesteko, osasun-agintaritzek zenbait neurri hartu dituzte kaltetutako zonaldean, eta 3 eta 10 km-ko babes- eta zaintza-eremuak ezarri dituzte fokuaren inguruan. Zonalde horietan hegaztien jabeek, profesionalak izan edo ez, dagozkien biosegurtasun-neurriak aplikatzea espero da.

BEKTOREEK TRANSMITITUTAKO GAIXOTASUNEI BURUZKO INFORMAZIO-MAPAK 17/05/26

Egile: EFSA

Europako Batasunak eskatuta, EFSAren Animalien Osasun eta Ongizate Taldeak 36 mapa interaktibo egin zituen, bektore bidez transmititzen diren gaixotasunen (VBD –ingelesezko siglak–) ezaugarri nagusiak laburbilduz. Mapa horiek webgunean ikus daitezke.

Adituen taldeak 36 VDBetako bakoitzak Europan sartzeko zuen arriskua neurtu zuen, banaka; zehazki, ganaduaren edo etxeko animalien mugimenduaren ondorioz sar daitezke. Horretarako, metodo erdikuantitatibo bat erabili zuten, arriskuaren alderdi esanguratsu guztiak kontuan izateko (MINTRISK eredua), baina EFSAk Europara egokitua (VBD-RISK eredua). 

VBD eragile guztietatik (36) zortzik bakarrik izan zuten EBn sartzeko moduko tasa globala (sarrera-tasa, bektorearen transmisioa eta establezimendua kontuan hartuta neurtzen da), eta tasa hori urtean 0,001 sarrera baino gehiagokoa dela kalkulatu zuten. Hona hemen zortzi VBD horiek: Krimea eta Kongoko sukar hemorragikoa, mihi urdinaren birusa, Nilo mendebaldeko sukarra, Schmallenberg birusa, Hepatozoon canis, Leishmania infantum, Bunyamwera birusa eta Highlands J birusa. 

Zortzi gaixotasun horien urteko hedapena ebaluatu zen, eta EBn erabilgarri dauden prebentzio- eta kontrol-neurriak ezartzeko beharra zehaztu zen. Horrez gain, VBDen hibernatzeko aukera ere ebaluatu zen, baita osasun publikoan, animalien osasunean eta nekazaritzako ekoizpenean izan dezaketen eragina ere. 

Gainerako 28 VBDen sarrera-tasa oso txikia zela ondorioztatu zen eta, horrenbestez, ez zen horiekin loturiko beste ebaluaziorik egin. Arriskua ebaluatzeko erabilitako parametro batzuek zalantzak sorrarazten dituzte eta gaixotasunaren egoera ezegonkorra da edo ezin da aurreikusi; hori dela eta, informazio gehiago eskuratutakoan ebaluazioa eguneratzea gomendatzen da. 

Arriskuen ebaluazioa EBko eskualde handietarako eta VBD eragile asko aintzat hartuta egin zen; horrenbestez, lehen hautaketatzat baino ez da hartu behar. VBD jakin baten arrisku-ebaluazio zehatzagoa nahi izanez gero, nazio-mailakoa edo nazioz gaindikoa, EFSA-VBD-RISK eredua doan eskura daiteke.

 

Vector-borne diseases - EFSA

58 orrialdetatik 1.a   Hurrengoa >>
ELIKA . Granja Modelo, z/g . 01192 . Arkaute (Araba) . Telefonoa: 945 122 170 . Faxa: 945 122 171 . berri@elika.eus
RSS iturria
WEB orri honek ez du besteren publizitaterik eta ez du jasotzen publizitatetik eratorritako finantzaziorik.
Diseño web Vitoria

Gure eta hirugarrenen cookieak erabiltzen ditugu, erabiltzaileen nabigazioa aztertzeko.

Bada, nabigatzen jarraitzen baduzu, cookieen erabilera onartzen duzula ulertuko dugu. Konfigurazioa aldatzeko edo informazio gehiago lortzeko jo hona.