elika Hemen zaude: Produkzio-sektoreakAbeltzaintza / Abere Osasuna elika

Abere Osasuna

H5N5 ETA H5N8 MOTAKO PHHGAREN EGOERA EUROPAN 17/04/19

Egile: Elika

2016ko urriaren 28tik 2017ko apirilaren 3ra, honako hauek jakinarazi dira Europan:

·         PHHGaren 1.095 foku etxeko hegaztietan

·         49 gatibu dauden hegaztietan

·         1.499 hegazti basatietan

 

Ikusi txostena: “Hegazti-gripearen egoera Eurpan, 2017ko apirilaren 3an” - MAPAMA

 

OIEk martxoaren 13ko txostenean adierazi bezala, Ipar Hemisferioan gero eta handiagoa da neguan hegazti-gripea agertzeko arriskua.

2016 eta 2017an, arrisku horren eraginez, H5N8 kasu ugari agertu dira Europan, eta H5N6 kasu ugari, berriz, Asian.

Urtaroaren araberako gorabeherak badaude ere, urte osoan zehar dago arriskua, birusa hegaztietan egonkortu baita eta bertan mantentzen baita.

Hala ere, azpimarratu beharra dago hegazti-gripearen andui zoonotikoak direla osasun publikoarentzat arriskutsuenak; andui horiek endemiko bilakatu dira Txinan (H7N9) eta Afrika zein Asiako hainbat eskualdetan (H5N1).

 

Espainiako egoera

 

Estatuaren eta Europar Batasunaren barruko mugimenduak mugatzen zituzten indarreko neurri guztiak kendu egin dira.

2017ko otsailaren 23an, Kataluniako Generalitateko albaitaritzaren arloko agintariek H5N8 motako PHHGaren foku bat hauteman zuten Gironako probintzian, loditzeko ahateen ustiategi batean. Hurrengo egunetan, martxoaren 1era arte, beste 9 foku hauteman ziren, 8 Girona probintzian eta 1 Bartzelonan.

Berehala ezarri ziren legediak zehazten dituen honako neurri hauek: kaltetutako ustiategietako hegaztiak hiltzea, ustiategiak garbitzea eta desinfektatzea, eta 3 kilometroko babes-gune bat eta 10 kilometroko zaintza-gune bat ezartzea fokuen inguruan; gune horietan, hegaztien eta haien produktuen mugimendua murriztu zen.

Batzordearen 2017/417 (EB) Exekuzio Aginduaren arabera, Espainian kalteak jaso dituzten lurraldeetako babes- eta zaintza-guneetako murrizketa-neurriek 2017ko apirilaren 1era arte egon behar zuten indarrean. Egun hori iritsita, ez da gaixotasunaren kasu berririk hauteman; ondorioz, Estatuaren eta Batasunaren barruko mugimenduei jarritako murrizketa guztiak bertan behera gelditu dira.

 

Beste herrialde batzuekiko merkataritzari dagokionez, Lehorreko Animalien Osasun Kodeak 10.4.3 artikuluan xedatzen du herrialde edo lurralde batek bere osasun-estatusa berreskuratu ahal izango duela kaltetutako ustiategi guztiak desinfektatzen dituenetik hiru hilabetera. Hori dela eta, Gironako probintziak eta Bartzelonako Ekialdeko eta Mendebaldeko Vallés eskualdeek beste herrialde batzuekin merkataritzan aritzeko mugak 2017ko ekainaren 2ra arte mantenduko dituzte. Une horretan, beste kasurik hauteman ez bada, Espainiako lurralde osoak nahitaez aitortu behar den hegazti-griperik gabeko herrialdearen estatusa berreskuratuko du.

 

Espainiako legedia

 

Joan den martxoaren 16an, APM/233/2017 Agindua argitaratu zen. Horrek APA/2442/2006 Aginduko eranskinak aldatzen ditu, eta bertan hegazti-gripearen aurrean babesteko neurri zehatzak ezartzen dira. Besteak beste, hau dio:

  • Hegazti-gripea sartzeko arrisku handia duten guneak dira padurak, ibaiertzak, kostaldeak, aintzirak eta 1. eranskinean aipatzen den beste edozein hezegune.
  • Arrisku faktoreak dira 3. eta 4. artikuluetan zerrendatutakoak.

EFSAK BERRIKUSI EGIN DITU MINGAIN URDIN GAIXOTASUNAREN KONTROL-NEURRIAK 17/03/10

Egile: EFSA

 

EFSAk argitaratu berri duen txostenean ondorioztatzen da 5 urteko txertaketa masiboko programak eta etengabeko zaintza-sistemak direla Europan ardien mingain urdin gaixotasuna errotik kentzeko neurri eraginkor bakarrak.

 

Europako Batzordeak hala eskatuta, EFSAko adituek mingain urdin gaixotasunaren kontrol-neurriak berrikusi dituzte, bai eta eremu infektatuen eta eremu askeen arteko animalien salerosketa segururako aukerak ere. Halaber, gaixotasunaren alderdi epidemiologikoei buruzko txosten zientifikoa eguneratu dute, batez ere transmisio-ereduari dagokion alderdia.

 

EFSAren txostenean ohartarazten da mingain urdin gaixotasuna errotik kentzea oso zaila dela, eta beharrezkoa dela gutxienez ondoz ondoko 5 urtez gaixotasun hori harrapa dezaketen behien eta ardien % 95 txertatzea. Txertaketa masiboko kanpaina horiekin batera, zaintza-sistema sentsibleak ere ezarri beharko dira. Sistema horiek kasuan kasu zehaztu beharko dira, kontuan izanik zaindutako eremu geografikoa eta gaixotasunaren fase epidemiologikoa; horrez gain, virusaren prebalentzia-maila baxuak (animalien % 1 baino gutxiago) hautemateko gai ere izan beharko dira. Hala ere, baliteke gaixotasuna txertaketa-kanpaina bukatu eta handik urte batzuetara berriz ere agertzea.

 

Halaber, adituek azpimarratu zuten animalia jaio berriek antigorputzak jasotzen dituztela amarengandik, eta horrek hiru hilabetez babesten dituela gaixotasunetik, gutxi gorabehera. Hala ere, antigorputz horiek eragina izan dezakete txertaketan; ondorioz, aldi horretan txertoak ez dira eraginkorrak. Kasu gehienetan, immunitatea oinarrizko txertaketa-eskemako bigarren dositik 21 egunera hasten da.

 

Beste alde batetik, gaixotasuna transmititzen duten eltxo-espezie batzuk urte osoan daude aktibo, batez ere negu epelak dituzten eskualdeetan, besteak beste mediterraneo arroan. Era horretako eremuetan, virusa edozein unetan transmiti daiteke. Eremu hotzagoetan, esate baterako, Europa iparraldean, eltxoak ez dira aktibo egoten neguko hiru hilabeteetan; aldi horretan, beraz, ez dago transmisiorik.

 

Datozen hilabeteetan, EFSAk ardien mingain urdin gaixotasun motak sailkatuko ditu, ezaugarrien arabera; hori baliagarria izango da babes- eta kontrol-neurri zehatzak identifikatzeko. Informazio hori 2017ko ekainean argitaratuko da.

 

Mingain urdin gaixotasunari buruzko iritzi zientifikoa - EFSA

7. EGUNERATZEA - H5N8 LEHENENGO KAUSA KALATUNIAKO USTIATEGI BATEAN 17/02/24

Egile:

 

Joan den asteazkenean, otsailak 22, Algeteko Albaritza Laborategi Zentralak, Madrilen, baieztatu zuen H5N8 motako hegazti-gripearen foku bat agertu zela gizentzeko ahateak hezteko aire zabaleko abeletxe batean, Gironako San Gregorio udalerrian. Gizentzeko ahateak hazteko ustiategi hori sei nabetan banatuta dago, aire zabaleko parkeekin, eta adin desberdinetako 17.800 ahate inguruko errolda du.

 

Ustiategian gaitza agertu dela berretsi ondoren, 445/2007 Errege Dekretuak ezartzen dituen neurri hauek hartu dira:

  • Ustiategia berehala geldiarazi da fokuaren susmoa agertu zenetik, eta erroldak eta azterketa klinikoa egin eta laginak hartu dira epidemiologikoki lotuta dauden ustiategi guztietan. Laginak laborategietan ikertzen ari dira gaur-gaurkoz.
  • Inkesta epidemiologikoa egin da, fokua nondik etor daitekeen aztertzeko eta beste ustiategi batzuk mugimenduagatik arriskuan egon daitezkeen ikusteko.
  • Gaitzaren eraginpeko ustiategiaren errolda osoa hil da, eta birusa tratamendu-planta baimendu batera heda lezaketen gorpuzkiak, pentsua eta gainerako materiak suntsitu.

 

Kataluniako Generalitatearen Nekazaritza, Abeltzaintza, Arrantza eta Elikadura Sailak baieztatzen duenez, lehen hipotesi gisa esan daiteke kutsatzearen arrazoia litzatekeela birus-mota bat etortzea joan den asteartean topatutako zikoinaren birusarekin, batetik, eta ustiategia hegazti migratzaile ugari –eta, beraz, hegazti basati ugari– igarotzen diren eremu batean egotea. Iturri horrek adierazi du CReSA Animalia Osasunaren Ikerketa Zentroari azterlan bat aginduko diola gaitza zehazki nondik datorren ikertzeko.

 

Katalunian, joan den asteartean, Los Aiguamolls del Empordàko Parke Naturalean hilda aurkitutako zikoina batean topatu zen fokua. Horren ondorioz, 3 kilometroko babes-eremu bat finkatu zen, eta eremu horretan dauden hiru hegazti-granjak geldiarazi ziren; granja horiek ere albaitarien ikerketapean daude. Bestalde, 10 kilometroko eremu batean hegazti basatiak ehizatzeko debekua ezarri da, eta hegazti basatien gaineko zaintza-mailak mantendu.

 

Aurkikuntza horiek jakinarazteak ez dakar ez muga komertzialik, ez hegazti bizien edo haien produktuen mugimenduaren gaineko mugarik. Horrez gain, ez da uste osasun publikorako arriskurik dagoenik; izan ere, birus osoaren sekuentzien analisian oinarritutako azterketa genetikoek erakusten dute hegazti-birus horrek ez duela gizakienganako afinitate berezirik. Gainera, birusa ezin da gizakiengana transmititu hegazti-haragi kozinatuaren, arrautzen edo hegazti-eratorrien bitartez. Biosegurtasunerako neurriak muturreraino eraman behar dira, ordea, gaitza etxeko hegaztiei transmiti ez dakien.

 

2016ko urriaren 28tik gaur arte, Europan IAAPen 781 foku jakinarazi dira etxeko hegaztietan, 38 foku hegazti gatibuetan eta 972 foku hegazti basatietan.

 

Kataluniako Gobernuaren prentsa-oharra – 2017-02-23

57 orrialdetatik 1.a   Hurrengoa >>
ELIKA . Granja Modelo, z/g . 01192 . Arkaute (Araba) . Telefonoa: 945 122 170 . Faxa: 945 122 171 . berri@elika.eus
RSS iturria
WEB orri honek ez du besteren publizitaterik eta ez du jasotzen publizitatetik eratorritako finantzaziorik.
Diseño web Vitoria

Gure eta hirugarrenen cookieak erabiltzen ditugu, erabiltzaileen nabigazioa aztertzeko.

Bada, nabigatzen jarraitzen baduzu, cookieen erabilera onartzen duzula ulertuko dugu. Konfigurazioa aldatzeko edo informazio gehiago lortzeko jo hona.