Animalia-jatorriko produktuen higieneari buruzko araua eguneratzea

Erregelamendua Europar Batasunaren Aldizkari Ofizialean argitaratu eta hogei egunera sartuko da indarrean.

Joan den abuztuaren 20an argitaratu zen 2021eko apirilaren 12ko Batzordearen 2021/1374 (EB) Erregelamendu Eskuordetua Europako Parlamentuaren eta Kontseiluaren 853/2004 (EE) Erregelamenduaren III. eranskina aldatzen duena, animalia-jatorriko elikagaien higiene-baldintza espezifikoei buruzkoa.

Hauek dira, besteak beste, 853/2004 Erregelamenduaren aldaketaren berritasun nagusietako batzuk:

• Animalien ongizatea dela eta, jatorrizko ustiategian animalia-kopuru txiki bat hiltzeko irizpideak aldatzen dira.
• “Albaitari baimendua” terminoaren ordez “albaitari ofiziala” jarri da.
• Gatzagia eta hesteak, buruak eta hankak lortzeko baldintzak adierazten dira.

• Txikizkako salmenta-jarduera egiten duten elikagai-enpresetako operadoreek haragia izoztu ahal izateko baldintzak ezartzen dira, elikagaiak dohaintzan emateko berriro banatzeari begira, eta, horrela, elikagaiak alferrik galtzea saihesten da.

• Hazitako animalia ehizatuen haragiaren kasuan kamelidoak bezalako espezieak sartzeko baldintzak eguneratu dira.
• Bilketa-zentroetarako arau espezifikoak eta animalia basati ehizatua garraiatzeko baldintzak ezarri dira.

• Bitarteko operadorearen figura definitzen da.
• Molusku bibalbio bizien sorta baten lekualdaketarekin batera erregistro-dokumentu bat aurkeztu beharko da, eta jaso behar duen gutxieneko informazioa zehazten da.

• Arraina biltegiratzean kutsadurarik ez sortzeko irizpideak ezartzen dira.
• “Izozte azkarraren” definizioa aldatu da iruzurrezko jarduerak saihesteko.
• Fusioko ura hustu egin behar dela zehazten da.

• Igel- eta barraskilo-espezie berriak sartzen dira.