EFSAk txosten berria argitaratu du, eta horren xedea izan da modu proaktiboan honako hauek identifikatzea eta ebaluatzea, 2024. urteari dagokionez: gai emergenteak; ahulezia-seinaleak; eta elikagaien eta pentsuen segurtasunari eta animalien eta landareen osasunari lotutako hurrengo berritasunak.
Gai emergenteak
EFSAk guztira 65 gai emergente bildu zituen 2024an zehar, eta horietatik 38 xeheago sailkatu ziren; eta, ebaluatu ondoren, horietako 7 arrisku emergente gisa identifikatu ziren eta jarraipen-gomendioak esleitu zitzaizkien, eta 23 ondorioak atera ahal izateko informazio gehiago behar duten gai gisa identifikatu ziren.
Identifikatutako arrisku emergente gehienak kutsatzaile eta arrisku biologikoen arlokoak dira:
- Azido trifluroazetikoa edateko urean.
- Chagas-en gaixotasuna, Trypanosoma cruzi parasito protozoarioak eragina.
- Elikagaien segurtasuna eta antifungikoekiko erresistentzia.
- Ostreopsis itsas alga tropikala eta horri lotutako toxinak ugaritzearekin lotutako giza osasunerako arriskuak.
- Akrilamida bidezko kutsadura landare-jatorriko proteinadun osagaietan.
- Elikagaiekin kontaktuan dauden material biodegradagarrietako glutenaren migrazioa.
- Erle nano gorriak (Apis florea); eta horrek eragin negatiboa du eztiaren ekoizpenean, landareen polinizazioan eta ekosistemaren oreka orokorrean.
Prospektiba-jarduerak
EFSAk prospektiba-jarduerak ere egin zituen; 19 txosten hautatu zituen, eta zehatzago aztertzeko 10 seinale identifikatu zituen.
2025ean, EFSAk bere kideekin duen elkarlana indartuko du, prospektibarako erakunde arteko partaidetzazko ekitaldia antolatuz, One Health ikuspegia hartuta (Osasun bakarra) etorkizunerako prestatutako estrategiak prestatzen eta garatzen laguntzeko. Proiektu horrek Aholkularitza Zientifikoko Agentzien Sarearen (UE-ANSA) baitan behin betiko prozesu bihur litekeen aukeraren balio erantsia erakutsiko du, EBko agentziek Europako Batzordearen Prospektiba Estrategikoaren Txostenei egiten dieten ekarpena koordinatzen lagunduz.
Eguneraketa data: 2025/07/18