Alemaniako Arriskuak Ebaluatzeko Institutu Federalak (BfR) frogatu du 2012. eta 2015. urteen artean egindako ikerketetan isolatutako bakterioak kolistinarekiko erresistenteak zirela, "mcr-1" gene transferigarriaren presentziaren eraginez.
Hainbat ikerketaren arabera, kolistinarekiko erresistentzia bereziki ohikoa da gizentzeko oilaskoetan isolatutako Salmonella eta Escherichia coli bezalako bakterietan.
BfRen ikerketen arabera, "mcr-1" gene transferigarria da erresistentzia horren eragilea. Gene hori lehen aldiz Txinan aurkitu zen, eta oso hedatuta dago Alemanian ekoizten diren animalien hesteetako bakterietan.
Hasieran, bazirudien ezinezkoa zela kolistinarekiko erresistentzia bakterio batetik bestera transferitzea; alabaina, ikusi da gene erresistenteak transmititu egin daitezkeela hesteetako bakterio kaltegabeen bitartez, hau da, bakterio komensal izenekoen bitartez, bakterio patogenoetara; horren ondorioz, bakterio patogeno horiek tratatzea zailagoa da.
Horrez gain, Alemanian, ikusi da animalien ekoizpenean isolatu diren eta kolistinari erresistenteak diren bakterien proportzioa ez dela azken urteotan handitu. Emaitzen arabera, mikrobioen aurkako erresistentzia hori urtetan existitu da Alemanian, baina duela gutxira arte ez da hauteman.
Orain, ikerketen helburua da neurtzea zer-nolako rola duen mikrobioen aurkako erresistentzia horrek gizakietan gaixotasun infekziosoen tratamenduan.
2015eko abenduaren hasieran, Danimarkako agintariek jakinarazi zuten gene hori hauteman zutela Alemaniatik iritsitako eskortako hegaztien haragiaren laginetan. Ingalaterran eta Herbehereetan egindako probetan ere emaitza positiboak lortu zituzten. Orain arte, erresistentziaren genearen presentziari buruzko ikerketa zehatzek frogatu dute Txinan deskribatutako gene hori Europan ere egon dela, gutxienez urtebetez.
Kolistinarekiko erresistentziari buruzko berria – BfR
Bideoa sukaldean oilaskoa nola prestatu – BfR