|
Iturria:
Europako Batzordea
|
Europako Batzordearen Landare, Animalia, Elikagai eta Pentsuen Batzorde Iraunkorrak, 2026ko maiatzaren 13an, erabaki zuen etorkizunean (EB) 2023/915 Erregelamendua aldatzen denean ezarriko diren olio mineralen hidrokarburo aromatikoen (MOAH) gehieneko mailak erabiltzea, kontrol-neurriak aplikatzeko oinarri gisa, (EE) 178/2002 Erregelamenduaren 14. artikuluarekin bat etorriz.
Erabakia hartu da zenbait elikagai-kategoriatan MOAHen gehieneko maila bateratuak lehen aldiz ezarri ondoren. Nahiz eta araudia 2027ko urtarrilaren 1etik aurrera aplikatu beharko den, gehieneko muga gehienak 2028 eta 2030 artean jarriko dira indarrean, apurka-apurka.
Aurretiko esparrua
2022ko apirilaz geroztik, estatu kideak aplikatzen ari dira Adierazpen Bateratu bat, zeinak elikagaietan dauden MOAHetarako kuantifikazio-muga bateratuak ezartzen baititu. Elikagai horien barruan sartzen dira bularreko haurrentzako eta adin txikikoentzako produktuak ere. Kutsatzaile horiek balio horietatik gora egoteak adierazten du elikagaia ez dela segurua, EBren elikaduraren legediaren arabera.
Nolanahi ere, 2022ko adierazpenean zehaztutako kuantifikazio-muga batzuk zorrotzagoak dira erregelamendu berrian ezarritako gehieneko mailak baino. Hori dela eta, estatu kideek erabaki dute, 2026ko maiatzaren 13tik aurrera, gehieneko muga berriak izatea erreferentzia araudia kontrolatu eta aplikatzeko jardueretarako.
Araudi berria etorkizunean aplikatzea
2022ko Adierazpen Bateratua ez zaie aplikatuko gehieneko maila espezifikoak ezarri zaizkien elikagaiei, maila horiek Erregelamenduan aurreikusitako egutegiaren arabera nahitaez bete beharrekoak izaten direnean.
Hala ere, gehieneko maila arauturik ez duten elikagai-kategorientzat, Adierazpen Bateratuak jarraituko du erreferentzia izaten, elikagaietan dauden MOAHak ebaluatzeko eta kudeatzeko.
Eguneraketa data: 2026/06/25