|
Iturria:
ECHA
|
Substantzia eta Nahasketa Kimikoen Europako Agentziak (ECHA) substantzia kimikoen arriskuak ebaluatzeko ikerketa-arlo berriak identifikatu eta lehendik zeudenak eguneratu ditu, Europar Batasunean segurtasun kimikoari buruzko erabaki arautzaileak hartzeko beharrezkoa den ebidentzia zientifikoa sortzeko.
ECHAk azpimarratu du eguneratzeak erronkei aurre egiteko balioko duela, hala nola kutsadura kimikoari, biodibertsitatearen galerari eta Europar Batasunean industria jasangarriago eta berritzaileago baterako trantsizioari; izan ere, horren bidez, giza osasunaren eta ingurumenaren babesa indartuko da.
Ikerketarako lehentasunak
Elikagaien eta uraren segurtasunaren ikuspegitik, ikerketa-lehentasunen xedea da ur-baliabideetara eta elikakatera iristen diren kutsatzaile kimikoen esposizio-bideei buruzko ezagutza hobetzea eta arrisku emergenteak garaiz identifikatzea.
- Substantzia iraunkorrak:
Azaleko uretara, akuiferoetara eta edateko uretara irits daitezkeen kutsatzaileak identifikatzeko metodoak hobetzea. - Elikakateko bioakumulazioa:
Substantzia jakin batzuk arrainetan, itsaskietan, faunan eta beste elikagai batzuetan nola metatzen diren ebaluatzeko tresna berriak garatzea, kontsumitzaileen esposizioa areagotzen baitute. - Elikagaien bidezko giza esposizioa:
Elikaduraren eta ingurumeneko beste esposizio-bide batzuen bidez substantzia kimiko kutsatzaileen ingestioa zenbatesteko ereduak hobetzea. - Ekosistemen kutsadura kimikoa:
Kutsatzaileek biodibertsitatean eta elikagaien ekoizpena nahiz uraren kalitatea bermatzen dituzten ekosistemetan duten eragina ulertzea. - Kutsatzaileen monitorizazio aurreratua:
Azaleko eta lurpeko uretan sortzen diren kutsatzaileak eta substantzia kimiko ezezagunak detektatzeko teknikak sustatzea. - Kutsatzaile kimikoen nahasteak eta haien “koktel-efektua”:
Ingurumenean eta elikakatean aldi berean dauden hainbat substantzia kimikoren efektu konbinatuak ikertzea. - Biozidekiko erresistentzia:
Segurtasun sanitarioan eta ingurumen-segurtasunean ondorioak dituzten biozidekiko erresistentzien agerpena detektatzeko eta ebaluatzeko metodo harmonizatuak garatzea. - Uretan eta elikagaietan irauten duten kutsatzaileak:
Substantzia oso iraunkorrak identifikatzea, hala nola PFAS jakin batzuk eta siloxanoak, eta haien erregulazioa hobetzea; izan ere, urte luzez iraun dezakete ingurumenean eta elikakatera transferitu. - Mikroplastikoak:
Uraren kalitatean duten eragina ebaluatzeko metodoak garatzea eta arrisku emergente horiek kudeatzeko erreferentzia-mailak ezartzea. - Ur-baliabideak babestea:
Lurpeko uretako eta edateko uraren iturburuetako kutsatzaileen ebaluazioa hobetzea.
Eguneraketa data: 2026/07/14