|
Fuente:
World Allergy Organization Journal
|
Duela gutxi argitaratu den azterlan batek ondorioztatu du elikaduragatiko alergiek 60 urtetik gorako pertsonen % 10i eragin diezaieketela. Azterlanak agerian uzten du oso gutxi ezagutzen direla zahartzaroko elikaduragatiko alergiak, eta, ziurrenik, gutxiegi diagnostikatzen direla. Horiek, ordea, ondorio garrantzitsuak izaten dituzte kolektibo horren osasunean, nutrizioan eta bizi-kalitatean. Era berean, azpimarratzen du beharrezkoa dela alergia horien diagnostikoa hobetzea eta ikerketa gehiago egitea orain arte gutxi aztertu den biztanleriari buruz.
Ondorio horietara iristeko, Italiako ikertalde batek 16 azterlanen berrikuspen sistematiko bat eta metaanalisi bat egin zituen. Azterlan horiek barne hartzen zituzten Europako, Ipar Amerikako, Asiako eta Hego Amerikako 11 herrialdetako 60 urtetik gorako 33.165 pertsona. Hala ere, ebidentziaren zatirik handiena diru-sarrera handiko herrialdeetakoa zen.
Aurkikuntza nagusiak
Adinekoen elikaduragatiko alergien prebalentzia nabarmen aldatzen da diagnostikoa egiteko erabilitako metodoaren arabera. Norberak jakinarazitako elikaduragatiko alergiak % 12 dira; E immunoglobulina espezifikoaren (IgE) bidez detektatutako sentsibilizazioa, berriz, %14koa da, eta norberak jakinarazitako eta mediku batek diagnostikatutako alergiaren prebalentzia, ordea, % 7koa da. Aintzat hartutako azterlan batek baino ez zuen erabili aho bidezko probokazio-proba, hau da, diagnostikoa egiteko erreferentziazko metodoa, eta % 0,5eko prebalentzia aurkitu zuen.
Inplikatutako lehengai ohikoenak izan ziren behi-esnea (% 3), kakahueteak (% 3), arrautza (% 2) eta soja (% 1).
Azterlanak agerian uzten du, halaber, zahartzeak aldatu egin dezakeela elikaduragatiko alergiak garatzeko eta agerrarazteko modua. Funtzio immunitarioak apurka-apurka behera egiteak, digestio-aldaketek, gaixotasun kronikoek, defizit nutrizionalek eta medikamentu ugari hartzeak eragin izan dezakete organismoak elikagaien aurrean duen erantzunean zein alergia horien adierazpen klinikoan.
Gainera, azterlanak ohartarazten du elikaduragatiko alergiekin lotutako dieta-murrizketek ondorio garrantzitsuak izan ditzaketela, batik bat justifikatua ez daudenean, kolektibo horren egoera nutrizionalean; izan ere, areagotu egiten dute desnutrizio, hauskortasuna eta sarkopenia izateko arriskua.
Azkenik, ikertaldeak eskatu du egin daitezela azterlan espezifiko gehiago adikoen artean, eta erabil daitezela diagnosi-irizpide estandarizatuak; izan ere biztanleria-talde horrek oso ordezkaritza txikia du elikaduragatiko alergien ikerketan.
Eguneraketa data: 2026/07/16