“Gardentasuna eta Komunikazioa, Elikagaien Segurtasunaren oinarriak” lelopean, Elikagaien Autokontrolari eta Segurtasunari buruzko 6. Biltzarra egin zen maiatzaren 25etik 27ra bitartean, Gasteizen.
Biltzarraren ardatz nagusia osatzen zuten gaiak ez ezik (Gardentasuna eta Komunikazioa), beste hainbat gai ere landu dira: alergenoak, elikagaiak ontziratzeko materialak, beste arrisku gutxietsi batzuk, kontrol ofizialen pribatizazioa, merkaturatzeko kanal laburrak eta Elikadura Osasungarria.
Biltzarrean izan dira Elikagaien Segurtasunaren arloko mundu osoko aditu nagusiak eta arlo horretan diharduten 300 profesional baino gehiago; eta mahai gaineratu egin dituzte elikagaien sektoreko gaurko eta biharko erronken inguruko esperientziak, ezagutzak eta irtenbideak.
Biltzarraren ondorio nagusietako bat izan da alderdi interesdun guztiak direla Elikagaien Segurtasunaren arloko komunikazioaren arduradun:
- Iturri ofizialak: zehatz eta modu gardenean eman behar dute informazioa.
- Hedabideak: informazio hori arduraz interpretatu eta transmititu behar dute.
- Herritarrak: iturri ofizialetara jo behar dute informazio bila.
Ikusirik Elikagaien Segurtasunaren errealitatea ez datorrela bat herritarrek arriskuen gainean duten ikuspegiarekin, behar-beharrezkoa da alderdi interesdun guztiek modu koordinatuan zehaztea Elikagaien Segurtasunaren arloko komunikazioaren estrategiak. Ildo horretatik, Gardentasuna eta Open Data ezinbestekoak dira estrategia horiek diseinatzeko eta sistemaren gaineko konfiantza areagotzeko.
Biltzarrari buruzko informazio guztia eta aurkezpenen zein ondorioen laburpenak ikusgai daude Biltzarraren webgune ofizialean:
Eguneraketa data: 2025/07/18