Horizon Europeren Erregelamendua eta Berariazko Programa Europar Batasunaren Egunari Ofizialean (EBEO) argitaratu ziren 2021eko maiatzaren 12an, eta, horrela, 2021-2027rako EBren Ikerketa eta Berrikuntzarako Esparru Programa berriari hasiera eman zitzaion. Erregelamendua atzeraeginezko ondoreekin aplikatu daiteke 2021eko urtarrilaren 1etik aurrera.
Zer da?
Horizon Europe programa, aurreko Horizon 2020 programa bezala, EBren I+G+B politikak gauzatzeko funtsezko tresna izango da. Programaren helburu orokorra EBk I+B arloan egiten dituen inbertsioen eragin zientifiko, teknologiko, ekonomiko eta soziala lortzea da, horren bidez oinarri zientifikoak eta teknologikoak indartzeko eta estatu kide guztien lehiakortasuna sustatzeko.
Zazpi urteko aldi horretarako 95.517 milioi euroko aurrekontuarekin, Horizon Europe izango da orain arteko aurrekontu handiena izango duen esparru-programa, eta etekin ekonomiko, sozial eta zientifiko handiak sortzeko ahalmena izango du. Uste da programa horrek gaikuntza handiko 320.000 lanpostu berri sortuko dituela 2040rako, eta Europak I+B arloan duen lidergoa sendotuko duela. Programa inbertsio-pentsamolde batean oinarrituta diseinatuta dago, finantzaketa-tresna gisa baino gehiago, eta plangintza bat izango du, EBri etorkizun oparo eta jasangarrirako trantsizioa egiten lagunduko diona.
Horizon Europe atari berria Espainian
Zientzia eta Berrikuntza Ministerioak (ZBM) Horizon Europe programaren atari berria sortu du; bertan, programaren berritasun guztiak aurkitu ahal izango dira. Atari horretan programaren zenbait zatiri buruzko informazioa dago, atal hauekin osatuta; Albisteak, Ekitaldiak, Dokumentu interesgarriak eta horietako bakoitzari lotutako esteka interesgarriak; bai eta Harremanetarako Puntu Nazionalak ere, deialdi irekiei buruz gehiago jakiteko.
Elikadura, Bioekonomia, Baliabide Naturalak, Nekazaritza eta Ingurumen Klusterra
6. klusterraren helburua ezagutza eta soluzio berritzaileak sortzea da, baliabide naturalen (biodibertsitatea, ura eta lurzorua) kudeaketa jasangarrirako trantsizioa bizkortzeko. Horren barruan, honako neurri hauek garatzea sartzen da:
- Klima-aldaketara egokitzen laguntzea.
- Lehen mailako produkzio-sistemen (nekazaritza, abeltzaintza, basogintza, arrantza eta akuikultura), elikadura-sistemen eta jatorri biologikoko balio-kateen klima-neutraltasuna lortzea.
- Ekosistemen zerbitzuak optimizatzea.
- Biodibertsitatearen galera gelditzea eta lehengoratzea.
- Ingurumenaren degradazioa eta kutsadura murriztea.
Jarduerak gizartearentzat onuragarriak izango dira, elikadura segurua eta osasungarria ematen dutelako, eta kontsumitzailearen portaera hobeto ulertzen dutelako. Landa eta kostaldeko eremuak garatzen ere lagunduko dute, bai eta gobernantza-ereduak ezartzen ere, jasangarritasunerako trantsizioa erraztuko dutenak.
Ildo horretan, 6. klusterraren ekintzek ekonomia lehiakorragoa, zirkularragoa eta jatorri biologikokoa, klimatikoki neutroa, erresilienteagoa eta ingurumenarekiko lagunkoiagoa izan dadin lagunduko dute, Klima Aldaketari buruzko Parisko Akordioen, Garapen Jasangarritako Helburuen eta Europako Itun Berdearen ildotik.
Kluster horren esparruan, lehentasunezko jarduketa-arlo hauek landuko dira:
- Ingurumenaren behaketa.
- Biodibertsitatea eta baliabide naturalak.
- Nekazaritza, basogintza eta landa-eremuak.
- Elikadura-sistemak.
- Bioekonomia eta jatorri biologikoko balio-kateak.
- Sistema zirkularrak.
- Ozeanoak, itsasoak eta barruko urak.
Europako Batzordeak apirilaren 23an argitaratu zuen 6. klusterraren (Elikadura, Bioekonomia, Baliabide Naturalak, Nekazaritza eta Ingurumena) 2021-2022 Lan Programaren zirriborroa. Kontsulta-dokumentu gisa erabili daiteke, baina garrantzitsua da kontuan hartzea behin-behineko dokumentu bat dela, eta aldaketak izan ditzakeela.
Balio duen dokumentu bakarra ofizialki Horizon Europe atarian argitaratzen dena izango da.
Araudi erregulatzailea
Eguneraketa data: 2025/05/06