Listeriaren kontrolari eta albaitaritza-sendagaien hondakinei buruzko Codexaren eguneraketak

Listeriaren kontrola kontsumitzeko prest dauden elikagaietan

Kontsumitzeko prest dauden elikagaietan Listeria monocytogenes kontrolatzeko jarraibideen berrikuspenak elikadura-kate osoan zehar patogeno horren kutsadura eta ugalketa prebenitzeko gomendioak eguneratzen ditu.

Argitaratu berri den dokumentuak hainbat berrikuntza garrantzitsu jasotzen ditu: genomikako tresnak eta genoma osoaren sekuentziazioa erabiltzea patogenoa zehaztasun handiagoz identifikatu eta haren trazabilitatea hobeto egiteko; elikadura-instalazioetako ingurumen-zaintzako programak indartzea; eta kontsumitzeko prest dauden elikagaiek Listeria monocytogenes ugaritzea zenbateraino ahalbidetzen duten ebaluatzeko irizpide berriak ezartzea. Halaber, produktuen balio-bizitza zehazteko orientabideak ematen ditu, erronka-azterketak eta eredu prediktiboak erabiliz.

Gainera, «baserritik mahaira» ikuspegi integrala hartzen du, eta gomendioak lehen mailako ekoizpenera, banaketara eta txikizkako salmentara zabaltzen ditu. Arreta berezia jartzen du hotz-katea mantentzeari eta denbora eta tenperatura kontrolatzeari.

Jarraibide horiek erreferentziazko tresna dira arrisku mikrobiologikoa eraginkortasunez kudeatzeko eta osasun publikoa babesteko konpromisoa duten elikadura-enpresentzat, agintari eskudunentzat eta sektoreko profesionalentzat.

Albaitaritza-sendagaien hondakinen arriskuaren ebaluazioa

Bestalde, FAOk albaitaritza-sendagaien hondakinen arriskua ebaluatzeko JECFA tresna-kitaren (Elikagai Gehigarriei buruzko FAO/OME Adituen Batzorde Mistoa) bertsio eguneratua argitaratu du. Plataforma interaktibo horrek JECFAk animalia-jatorriko elikagaietan —hala nola haragian, esnean, arrautzetan eta eztian— dauden albaitaritza-sendagaien hondakinen segurtasuna ebaluatzeko erabiltzen duen metodologia zientifikoa azaltzen du.

Bertsio berriak hainbat hobekuntza dakartza, zehaztasun zientifikoa eta koherentzia metodologikoa indartzeko eta edukien argitasuna eta erabiltzaile-esperientzia hobetzeko. Tresnak arriskuaren ebaluazioaren etapa guztietan gidatzen ditu erabiltzaileak, osasunean izan ditzakeen ondorioen azterketatik hasi eta elikagaien bidezko esposizioaren zenbatespenera arte. Horrela, oinarri zientifiko sendoa eskaintzen du hondakinen gehieneko mugak (HGM) ezartzeko eta nazioarteko estandarrak garatzeko.

Eguneraketa hau agintari eskudunei, erakunde arautzaileei, albaitaritza-industria farmazeutikoari eta abeltzaintza-sektoreari zuzenduta dago, eta elikagaien segurtasunaren arloko gaitasun teknikoak indartzen laguntzen du. Horren bidez, osasun publikoa babestea eta elikadura-kateko albaitaritza-sendagaien kontrolak nazioartean harmonizatzea sustatzen da.