Osasungarriak al dira haurren elikadura-ohiturak?

Ohitura nutrizional onek nabarmen murriztu ditzakete haurren obesitatearen eta gehiegizko pisuaren arriskuak

Obesitatearen Munduko Egunaren harira, Europako OMEk haurren artean elikadura-ohitura osasungarriak sustatzeko premiazko beharra planteatu du. Gomendio hori Haurren Obesitatea Zaintzeko Europako Ekimenaren (COSI) emaitzetan oinarritzen da.

132.489 haurren elikadura-ohiturak irudikatzen dituzten datuen arabera, haurren % 78,8ak gosaltzen du, % 42,5ak egunero jaten du fruta freskoa eta % 22,6ak kontsumitzen ditu barazkiak egunero. Haurren % 10,3ak ogitarteko gozoak kontsumitzen ditu egunero, eta % 9,4ak freskagarriak edaten ditu egunero. Hala ere, elikadura-ohituretan alde nabarmenak daude herrialdeen artean.

Azterlanaren datuetan oinarrituta, premiazko ekintzak behar dira Europako herrialde guztietako haurren artean elikadura-ohitura osasungarriak sustatzeko, eta bereziki fruta eta barazki freskoen eguneroko kontsumoa handitzeko.

Elikadura osasungarria da transmitigarriak ez diren gaixotasunak prebenitzeko oinarrietako bat. Elikadura txarra, gehiegizko pisua eta obesitatea bihotzeko gaixotasunak eta minbizia izateko arrisku-faktore garrantzitsuak dira, eta horiek dira, hain zuzen, Europako bi heriotza‑kausa nagusiak.

Haurtzaroan elikadura osasuntsua izatea lehentasunezko kontua da. Politikak egiteko ardura dutenek hazkuntza eta garapen osasuntsuak sustatu behar dituzte haurren artean. Horretarako, beharrezkoa da:

• Haurrentzat osasungarriak ez diren elikagai eta edarien komertzializazioa arautzea.
• Etiketetako informazio nutrizionala bateratzea.
• Azukre, koipe eta gatz ugari duten elikagaien birmoldaketa sustatzea.
• Zerga-pizgarriak ezartzea, hala nola edari azukredunen gaineko zerga.
• Eskoletan eta beste erakunde publiko batzuetan elikagai osasungarriak eskuratzeko aukera ahalbidetzea.
• Haurrek elikadura-ohitura osasungarriak bereganatzeko ekimenak sustatzea.