|
Iturria:
Sendagaien eta Osasun Produktuen Espainiako Agentzia (AEMPS)
|
Sendagaien eta Osasun Produktuen Espainiako Agentziak (AEMPS) duela gutxi aurkeztu du Antibiotikoekiko Erresistentziaren aurkako Plan Nazionalaren (PRAN) urteko txostena. Bertan, mikrobioen aurkako erresistentziei (MAE) aurre egiteko 2025ean garatutako jarduera nagusiak jasotzen dira.
Aurrerapen handiak animalien osasunean
PRANen azken txostenak azpimarratzen du animalien osasunak emaitza esanguratsuenetako batzuk lortu diren arloetako bat izaten jarraitzen duela. Plana hasi zenetik, animalietan antibiotikoen kontsumoa % 60,15 murriztu da; horri esker, Espainia sendagai horien erabilera animalia-ekoizpenean gehien murriztu duten herrialdeen artean dago.
Erresistentziak sortzeko arrisku txikieneko kategorietan sailkatutako mikrobioen aurkako sendagaiak erabili dira nagusiki, eta kritikotzat jotakoen erabilera oso mugatua izan da.
Era berean, animalia-espezie guztietako kontsumo-datuak biltzeko eta automatizatzeko lanetan aurrera egin da, PRESVET tresnaren bidez, Europako betekizunak betetzeko.
Animalietan eta elikagaietan bakterio zoonosikoak eta erresistentziak zaintzeko programak indartu dira:
- Osasun publikoarentzat eta animalien osasunarentzat garrantzitsuak diren bakterio erresistenteen presentzia monitorizatu da, behi- eta txerri-hiltegi nahiz txikizkako saltokietako laginak aztertuta.
- Gizentzeko txerrietan metizilinarekiko erresistentea den Staphylococcus aureus (SARM) bakterioaren jarraipena egin da.
Animalietako bakterio patogeno klinikoen zaintza sustatzen jarraitzen da. Horri esker, albaitaritza-jardunean informazio epidemiologiko zehatzagoa eskuratu eta tratamenduari buruzko erabakiak hartzea erraztuko da.
2025eko berrikuntza gisa, mikrobioen aurkako sendagaien erabilera optimizatzeko lehen programak (PROA) jarri dira abian. Ekimen horrek albaitaritzaren esparruko ekoizpen- eta klinika-sektoreetarako tresna, gida eta prestakuntza-jarduera espezifikoak garatzea ahalbidetuko du.
Giza osasuna
Antibiotikoen kontsumoa % 14 murriztu da, 2015ean erregistratutako gehieneko mailekin alderatuta. Gainera, erresistentziak zaintzeko sareak indartu dira, eta ospitaleetan zein lehen mailako arretan PROA programak sendotu dira, sendagai horien preskripzio egokiagoa sustatzeko.
Ingurumena
PRANen ingurumen-osagaiak protagonismo handiagoa hartu du 2025ean, gainazaleko uretan bakterio erresistenteak eta erresistentzia-geneak monitorizatzeko proiektu pilotuak amaitu baitira. Lan horiek etorkizunean One Health ikuspegiaren barruko ingurumen-zaintzako programak garatzeko oinarria izango dira.
Txostenak ondorioztatzen du mikrobioen aurkako erresistentzien kontrako borrokak estrategia bateratua eta osasunaren, albaitaritzaren eta ingurumenaren sektoreen arteko jarduketa koordinatua behar dituela. 2025ean lortutako aurrerapenek erakusten dute One Health estrategia emaitzak ematen ari dela; hala ere, oraindik erronka handiak daude Europar Batasunak 2030erako ezarritako helburuak lortzeko.
Eguneraketa data: 2026/10/30

