Q sukarrari buruzko ebaluazio epidemiologiko berria

Ebaluazioan 2016. eta 2024. urteen artean jakinarazitako 3.808 kasu bildu dira, eta intzidentzia handiena Kanarietan, Errioxan, Nafarroan, Extremaduran eta EAEn ikusi da, bereziki martxotik maiatzera bitartean (hausnarkariak erditzen diren aldian).

Animalietan egindako zaintzak berretsi egin du Coxiella burnetii dagoela ardien, ahuntzen eta behien taldeetan. Hauek nabarmendu dira:

• Hausnarkari txikietan, haurdunaldiaren amaierako abortuen tasa altuekin lotuta dago, eta taldearen % 90ari eragin diezaioke agerraldi bat dagoenean. Bakterioa plazentaren, likido amniotikoaren, esnearen, gorozkien eta gernuaren bidez iraitz daiteke, eta horrenbestez ingurumenean zabaltzen da.
• Haurdun ez dauden emeek ez dute sintomarik izaten, eta horrek ahalbidetu egiten du bakterioak “isilik zabaltzea” ustiategietan.
• Behien kasuan, infekzioak lotura handiagoa dauka metritisarekin, antzutasunarekin eta, neurri txikiagoan, pneumoniarekin.

Gizakien kasuan, infekzioen % 60etan ez da sintomarik izaten, baina agertzen direnean hauek izaten dira: sukarra, ondoez orokorra, pneumonia edo hepatitisa.

Ondorioak

Txostenak berretsi egiten du Espainia egoera endemiko egonkorrean dagoela, herritarrenganako eragina txikia dela eta arriskua neurrizkoa dela esposizioan dauden profesionalentzat.

Gomendioak

Osasun Ministerioak azpimarratu du ekintza hauek beharrezkoak direla:

• Ustiategietako biosegurtasuna hobetzea.
• Gizakien eta animalien zaintza sendotzea.
• Giza osasunaren, albaitaritza-osasunaren eta ingurumen-osasunaren arteko koordinazioa indartzea.
• Agerraldiren bat dagoenean, herritarrei informazioa ematea eta prebentzio-neurriak aplikatzea.

Gaixotasunari eta gizakiengan duen eraginari buruzko informazio gehiago nahi izanez gero (izan ere, ZOONOSI bat da eta ardiei, ahuntzei eta behiei eragiten die, baina baita gizakiei ere), kontsultatu hauek: