Elikakatea manipulazio prozesua da: elikagaiaren jatorritik hasi eta elikagai hori kontsumituko den lekuraino heldu artekoa, hain zuzen. Eta kate-mailen arteko lotura garraioa litzateke.
Elikakateko mailak honako hauek dira:
Jatorria
Elikagaiak lortzen diren lekua da (abeletxea, ustiategia…).
Eraldaketa prozesua
Hainbat elikagai manipulatuak izaten dira bai bere ezaugarriak aldatzeko, bai iraupena luzatzeko; eta, horrela, batetik, elikagai ezberdinak sortu ahal dira, eta, bestetik, elikagaiak hobeto aprobetxatu ahal dira. Baina elikagai guztiak ez dira eraldatzen; izan ere, elikagai asko fresko kontsumitzen dira, hau da, inolako aldaketarik jasan gabe.
Biltegiratzea
Elikagaiak banatu aurretik, denbora tarte batean gorde egiten dira, eta horixe da biltegiratzea. Prozesu horretan, elikagaia kontserbatzeko ezaugarriak errespetatu egin behar dira, fabrikatzaileak zehaztu bezala.
Garraioa
Elikakateko elementu guztiak biltzen ditu garraioak, eta prozesuan elikagai bakoitza kontserbatzeko ezaugarriak errespetatu egin behar dira.
Salmenta
Etapa honetan elikagaiak kontsumitzailearen eskura jartzen dira: supermerkatuak, harategiak, arrandegiak, etab.
Kontsumoa
Elikagaien azken helmuga da kontsumoa. Eta honako leku hauetan gauzatzen da: etxeak, jatetxeak, eskoletako jantokiak, etab.