|
Fuente:
ECDC
|
ECDCk ebaluazioen lehen zikloko emaitzak argitaratu ditu osasun-larrialdietarako prestatzearen eremuan, eta aurrerapen esanguratsuak ikusi ditu zaintzaren, laborategien eta krisiaren kudeaketaren gaietan. Txostenak One Health ikuspegiaren garrantzia azpimarratu du, eta, horretarako, besteak beste, honako hauek ebaluatu ditu: gaixotasun zoonotikoak, mikrobioen aurkako erresistentzia eta klimaren aldaketarekin lotutako ingurumen-mehatxuak.
Gaixotasunak Prebenitu eta Kontrolatzeko Europako Zentroak (ECDC) ebaluazioaren Europako lehenengo zikloa amaitu du osasun-larrialdien aurka prestatzeko lanaren barruan. Helburua da Europar Batasuneko (EB) eta Europako Esparru Ekonomikoko (EEE) herrialdeen gaitasuna aztertzea osasun-mehatxuak prebenitu, detektatu eta haien aurka erantzuteko.
Aurkikuntza nagusiak
ECDCren ebaluazioen arabera, EB eta EEEko herrialdeek asko indartu dituzte beren prestakuntza-gaitasunak osasun-larrialdien aurka COVID-19aren pandemiaz geroztik. Oro har, ikusi dira epidemiologia zaintzeko sistema sendoak, laborategien gaitasuna eta larrialdiak kudeatzeko mekanismoak, erakunde-konpromiso indartsuarekin batera osasun publikoa hobetzearen alde.
One Health ikuspegitik, ECDCk nabarmendu du giza osasunerako, animalietarako eta ingurumenerako mehatxuen aurka prestakuntza indartzearen garrantzia. Ebaluatutako arloen barruan daude gaixotasun zoonotikoak, ingurumen-jatorriko mehatxuak, klimaren aldaketarekin lotutakoak barne, eta mikrobioen aurkako erresistentziak; arlo horiek geroz eta garrantzi handiagoa dute osasun publikoaren eta elikagaien segurtasunaren eremuan.
Identifikatu diren erronkak
Aurreratu arren, ebaluazioek agerian utzi dituzte herrialde askotan erronka erkideak. Azpimarra daitezke langile adituen eskasia, datuen trukaketarako eta informazio-sistemen elkarreragingarritasunerako mugak eta ebidentzia zientifikoa erabakiak hartzera eramateko zailtasunak.
Halaber, ECDCk azaldu du eraginkortasun handiagoaz aplikatu behar direla prestatze- eta erantzun-planak, sektoreen arteko koordinazioa indartu behar dela eta aldizkako ariketak egin behar direla etorkizuneko osasun-krisien aurka erantzute-mekanismoen eraginkortasuna egiaztatzeko.
Emaitzak oinarri izango dira ebaluazioen hurrengo zikloetarako 2027-2029 aldian eta herrialdeei laguntzeko hobekuntza-ekintzak inplementatzen.